“İnam” Plüralizm Mərkəzinin rəhbəri Vahid Qazinin “Qara çörəyin ağ üzü” essesi Litvada çap olunub. Bu barədə RİYAD MEDİA-ya Vahid Qazi özü məlumat verib.

Tanınmış siyasətçi, “Sayudis” hərəkatının qurucularından biri, 1990-1992-ci illərdə Litva dövlətinin başçısı olmuş Avropa Parlamentinin üzvü Vitautas Landsbergisdən bəhs edən esse ölkənin aparıcı nəşrlərindən olan “Lietuvos žinios“ (“Litva xəbərləri”) qəzetinin 26 fevral sayında işıq üzü görüb.

Esseni Litva dilinə Litva Azərbaycanlıları Cəmiyyətinin sədri Mahir Həmzəyev və Edita Ratkuviene çeviriblər. Qəzetdə essenin müəllifi haqda məlumat da yer alıb.

1909-cu ildən çıxan “Lietuvos žinios“ gündəliyi Litvanın ən qədim və nüfuzlu kütləvi informasiya vasitələrindən biridir. Qəzetin populyar internet versiyası da mövcuddur və V.Qazinin essesi həmin portalda da yerləşdirilib. Litvanın nüfuzlu www.alfa.lt internet saytı da esseni dərc edib.

Tədqiqatçı filoloq və dilçi mütəxəssis Mahir Həmzəyev 1979-cu ildən Vilnüsdə yaşayır, ölkədə ictimai-mədəni xadim və Azərbaycan diasporunun siyasi dairələrdə nüfuzlu rəhbəri kimi tanınır. 1988-ci ildə onun Vilnüsdə yaratdığı Litva Azərbaycanlıları Cəmiyyəti milli-mənəvi və mədəni dəyərlərin Litvada və digər Baltik ölkələrində təbliğində fəal iştirak edir.

Mahir Həmzəyev indiyədək Litva dilinə Azərbaycan xalq nağıllarını çevirib, Nizami, Abdulla Şaiq, Bəxtiyar Vahabzadə, Gülhüseyn Hüseynoğlu, Eldar Nəsibli, Məmməd Namaz, Rəşad Məcid və digər Azərbaycan yazarlarının əsərlərindən tərcümələri çap etdirib.