Azərbaycan Respublikasının Prezidenti yanında Strateji Araşdırmalar Mərkəzinin (SAM) dəvəti ilə Türkiyənin Beynəlxalq Strateji Araşdırmalar Mərkəzinin(USAD) rəhbəri Cəlal Cem Oğuz fevral ayının 8-dən 11-dək Azərbaycanda səfərdə olacaq. SAM-ın mətbuat xidmətindən RİYAD MEDİA-ya verilən məlumata görə, Səfər çərçivəsində türkiyəli alim Azərbaycanın bir sıra rəsmi şəxsləri, elm xadimləri, beynəlxalq münasibətlər üzrə mütəxəssisləri ilə görüşləri nəzərdə tutulub.

Qeyd edək ki, Avrasiya regionu, Türkiyənin xarici siyasəti, Rusiya-Türkiyə münasibətləri üzrə tanınmış mütəxəssis Cem Oğuz 1997-2001-ci illərdə Türkiyə Xarici İşlər Nazirliyi nəzdində Strateji Araşdırmalar Mərkəzinin məsləhətçisi və layihə koordinatoru vəzifələrində çalışmış, erməni soyqırımı iddiaları ilə bağlı Rusiya, Almaniya, İsrail və digər ölkələrin arxivlərində tədqiqat işi aparıb. 2000-2001-ci illərdə Avrasiya Strateji Araşdırmalar Mərkəzində Rusiya-Ukrayna şöbəsinin sədri olmuş C.Oğuz 1999-2002-ci illərdə Yeni Türkiyə Araşdırma və Yayım Mərkəzinin məsləhətçisi vəzifəsində də çalışıb.

Cem Oğuz Türkiyənin qabaqcıl mətbu orqanlarının siyasi icmalçısı və köşə yazarı olmaqla yanaşı, bir çox elmi, publisistik, bədii monoqrafiya və məqalələrin müəllifidir.