Mayın 6-da Siyasi İnnovasiya və Texnologiya Mərkəzi (SİTM) 2009-cu il aprel ayında beynəlxalq və regional ictimai-siyasi proseslərin ümumi yekunları ilə bağlı mərkəzin hazırladığı analitik mətbuat konfransı keçirib. SİTM-nin rəhbəri Mübariz Əhmədoğlu yekunla bağlı məsələyə keçməmişdən qabaq aprelin 30-da Azərbaycan Dövlət Neft Akademiyasında (ADNA) baş verən hadisənin qurbanlarının xatirəsini bir dəqiqəlik anımdan sonra, elə bu məsələ ilə bağlı fikirlərini bildirdi. 
 Politoloq ADNA-da baş verənləri pisləyərək burda kürd, hətta İran faktorunun da ola bilməsinin qaçılmaz olduğunu vurğuladı. Həmçini o, bildirdi ki, Gürcüstanda fəaliyyət göstərən “Nitq” Analitik Mərkəzi məhz İran dövlətinin təşəbüsü ilə yaradılıb və bu mərkəzin ilk təyinatı Azərbaycana, ikinci təyinatı Gürcüstana qarşı, lazım gəldikdə isə hətta Ermənistan rəhbərliyinə qarşı mübarizə aparmaqdır.
Daha sonra ADNA-da qətliyam törədənin və bu kimi insanları kütləvi qəbirsanlıqda yox, onlar üçün “Lənət Qəbirsanlığının” yaradılmasını təklif etdi. Hətta bunun üçün Bakı ilə H.Z.Tağıyev qəsəbəsi arasında geniş boş sahələrin olduğunu da vurğuladı.
Sonra Türkiyə ilə Ermənistanın münasibətlərinin normallaşması, “erməni soyqırımı”nın tanınması ətrafında baş verənlər haqqında söhbət açan politoloq bu iki məsələ ətrafında baş verənləri ətraflı təhlil etdi. Daha sonra Türkiyə ilə Ermənistanın sərhədləri açması və bu işdə ABŞ-ın rolunun olmasına və Dağlıq Qarabağ münaqişə barədə də öz münasibətini bildirdi.