Sahibkarlığa Kömək Milli Fondunun nümayəndələri  “AzAqro” MMC regionların sosial-iqtisadi inkişaf proqramına uyğun olaraq Şəmkir rayonunun Sarıtəpə kəndində  faraş tərəvəz məhsullarının yetişdirilməsi üçün istixana kompleksində olublar. RİYAD MEDİA-nın Qərb bölgə müxbirinin xəbərinə görə, dəyəri 5 milyon manat olan bu layihənin 3 milyon manatı Sahibkarlığa Kömək Milli Fondunun kreditləri hesabına, qalan hissəsi isə təsisçilərin vəsaitləri hesabına maliyyələşdirilib.

“AzAqro” MMC-nin direktoru İlkin Quliyev bildirib ki, istixanada İsrailin “Netafim” şirkətinin avadanlıqları quraşdırılıb: “Burada əsas üstünlük ondan ibarətdir ki, tərəvəz bitkiləri kokos qabığında becərilir. İlkin mərhələdə pomidor əkilib. Pomidorların tozlanması arılar vasitəsilə aparılacaq. Ardınca xiyar, gələcəkdə isə təlabat olarsa, rəngli bibər və çiyələk yetişdiriləcək”.

İstixana damcılama üsulu ilə suvarılır. Bu sistem şitili lazımi miqdarda su, qida və hava ilə təmin edir. İstixanada il ərzində 1000 ton məhsul götürülməsi planlaşdırılır.  1 kv.m ərazidən 40-45 kq və 1 ştildə isə 13-14 kq  məhsul götürüləcək.

İstehsal olunana məhsulların 35 faizi daxili bazarda digər hissəsi isə Rusiya bazarına ixrac ediləcək. İstixananın örtüyü ulturabənövşəyi şua vermək qabiliyyətindədir. Mövsümdən asılı olaraq avtomatik pəncərələr bağlanır, qaz kəsilir.