Milli  Məclisin  deputatları  Qənirə  Paşayeva və Həvva  Məmmədova fevralın 25-dən 28-dək  Almaniyada səfərdə  olacaqlar. Bu barədə RİYAD MEDİA-ya Milli Məclisin mətbuat xidmətindən bildirilib.

Deputatlarımız Almaniyada yaşayan Azərbaycanlıların Koordinasiya və Atatürk Düşüncə Mərkəzlərinin təşkilatçılığı ilə Berlin və Hamburq şəhərlərində keçiriləcək “Qafqazda barışıq yolunda Türk – Azərbaycan münasibətlərinin rolu” mövzusuna həsr olunmuş tədbirlərdə iştirak edəcəklər.

Millət  vəkilləri toplantıda Xocalı faciənin 18-ci ildönümü ilə bağlı çıxış edəcək, Azərbaycan dövləti  və  parlamentinin,  Heydər Əliyev Fondunun Xocalı  soyqırımının  beynəlxalq  ictimaiyyətə  tanıdılması istiqamətində gördüyü işlər, İKT Gənclər Forumunun Mədəniyyətlərarası  dialoq üzrə  baş əlaqələndiricisi Leyla  Əliyevanın  rəhbərliyi  altında  keçirilən “Xocalıya ədalət” kampaniyası  barədə   iştirakçılara ətraflı məlumat verəcəklər. Azərbaycan və türk  diasporlarının  bu  istiqamətdə səylərinin artırılması barədə fikirlərini açıqlayacaqlar.