Bu gün Mərkəzi Bankda Kütləvi Ödənişlər üzrə Mərkəzləşdirilmiş İnformasiya Sistemi (KÖMİS) layihəsinin geniş təqdimat mərasimi keçirilib. Mərkəzi Bankın mətbuat xidmətindən RİYAD MEDİA-ya verilən məlumata görə, tədbirdə  yerli və xarici KİV, layihə üzrə mövcud və potensial iştirakçı təşkilatların rəhbərləri, bankların nümayəndələri iştirak ediblər.

Mərkəzi Bankın sədrinin birinci müavini Alim Quliyev KÖMİS layihəsinin ölkəmiz üçün ümümmili əhəmiyyətinin olduğunu və region ölkələri içərisində ilk dəfə Azərbaycanda həyata keçirildiyini bildirib: “KOMİS layihəsi yaradılarkən Beynəlxalq maliyyə institutlarının texniki yardımından geniş istifadə edilmiş və bu sahədə mövcud olan mütərəqqi dünya təcrübəsi diqqətlə öyrənilmişdir. Nəticədə,  32 ölkənin 400-ə yaxın təşkilatında istifadə olunan CheckFree i-Series informasiya sistemi bazasında yerli tələblərə tam uyğunlaşdlırılmış bir sistem yaradılıb”.