sharespost.com səhmlərin ticarət portalının sahibi olan SharesPost şirkətinin araşdırmalarına əsasən internetin ən iri sosial şəbəkəsi Facebook servisinin kapitallaşdırılması 11,5 milyard ABŞ dollarına dəyərləndirilir.

RİYAD MEDİA-nın xəbərinə görə, bununla yanaşı ötən ilin noyabr ayının sonunda servis 9,5 milyard dollara qiymətləndirilmişdir. Belə ki, üç aydan bir qədər çox müddətə Facebook-un bu göstəricisi 21 faiz artıb. SharesPost qeyd edir ki, Facebook-un qiymətli kağızları açıq bazarda təqdim olunsaydı onların qiyməti bu gün üçün 442,4 milyon buraxılmış səhmin dəyəri nəzərə alınmaqla bir ədədə görə 26 dollar təşkil edəcəkdi.

Ekspertlər hesab edir ki, bu qiymət Rusiyanın Digital Sky Technologies (DST) İnfestisiya Fondu tərəfindən Facebook-un beş faizlik paketi üçün ödənilmiş məbləğdən düz 76 faiz yüksəkdir.

Bu gün sosial şəbəkənin səhmləri açıq satışa çıxarılmadığından şirkətin dəqiq bazar qiymətini dəyərləndirmək çətindir. Bununla yanaşı informasiya agentliklərinin yazdığına görə Facebook-un qapalı bazarda qiymətli kağızları daha baha satılır. Alıcılar servisin bir səhminə görə 41 dollar belə ödəməyə hazırdır.

Hazırda Facebook sosial şəbəkəsi 400 milyon istifadəçini əhatə edir.