Od çərşənbəsi Boz ayın dörd müqəddəs çərşənbəsindən ikincisidir. Buna bəzən xalq arasında üsgü (tonqal) və ya ocaq çərşənbəsi də deyilir. İnamlara görə insan odu nə qədər əzizləsə o qədər yüngül olar, çətinlikləri azalar. Bütün həyətlərdə tonqal qalanar.

Çərşənbələr Novruz bayramının əsas atributlarındandır. Bəzi ehtimallara görə, bu bayram e.ə. 505-ci ildən qeyd olunur. Şimal yarımkürəsində yazın başlandığı, gecə-gündüz bərabərliyi günündə, martın 20-21-də keçirilir. Azərbaycanda, adətə görə, Novruz bayramında göyərdilən səməni yazın gəlməsinin, təbiətin canlanmasının, əkinçiliyin rəmzidir. Novruz bayramı qabağı adətən evdə həyətdə abadlıq, təmizlik işləri aparılır, ağac əkilir, şiriniyyat növləri (qoğal, külçə, fəsəli, paxlava, şəkərbura, şəkərçörəyi və s.) və plov bişirilir.

Rəngbərəng yumurta boyanır, sinilərdə xonça bəzənir, şam yandırılır, tonqal qalanır, səməni qoyulur, küsülülər barışır, qohum-qonşular bir-birinə qonaq gedir, pay göndərirlər. İnsanların etiqadına görə bir ilini necə keçirəcəyi Novruzun necə gəlməsi ilə əlaqədardır.

Çərşənbəniz mübarək!