2010-2011-ci illərdə Azərbaycan GUAM-ın Gənclər Forumuna ev sahibliyi edəcək. RİYAD MEDİA-nın məlumatına görə, bu barədə Gənclər və İdman naziri Azad Rəhimov 2009-cu ilin səkkiz ayı ərzində görülən işlər barəsində keçirdiyi mətbuat konfransında deyib. Nazir bildirib ki, bu il ilk dəfə olaraq Azərbaycanın regionlarında gənclər üçün maarifləndirici yay düşərgələri keçirilib. Cari ilin səkkiz ayı ərzində 150-yə yaxın gənc beynəlxalq tədbirlərdə iştirak edərək ölkəmizi təmsil edib. 23 QHT-nin Gənclərlə bağlı layihələri və 10 böyük layihə Nazirlik tərəfindən maliyyələşdirilib. Hazırda 100-ə yaxın layihə Nazirlikdən qeydiyyatdan keçib ki, komissiyalar tərəfindən onlar üzərində iş aparılır.

Nazir A. Rəhimov həmçinin qeyd edib ki, ilin ən vacib tədbirlərindən biri də, keçiriləcəyi gözlənilən Tələbə Gənclər Təşkilatının toplantısında ilk dəfə olaraq Ümumrespublika sədri seçiləcək. Azərbaycanda ilk dəfə olaraq 37 ölkənin iştirakı ilə fizika, kimya, biologiya üzrə beynəlxalq olimpiada keçiriləcək: “Bu ölkəmizin beynəlxalq aləmdə tanınması və imicinin yüksəlməsi üçün mühüm tədbirdi”.