Dünən Avropa Komissiyasının Azərbaycandakı nümayəndəliyinin məsul şəxsləri Manfredas Limantas və Jerome Pons Qeydiyyatından İmtina Olunan QHT-lərin Əlaqələndirmə Şəbəkəsinin nümayəndələri – Demokratik İslahatlar Uğrunda Cəmiyyətin (DİUC) həmsədrləri Razi Nurullayev və Oqtay Gülalıyev, “Alyans” Canlı Aləm və Etika İB-nin sədri Mənsurə Rəsulzadə ilə görüşüblər. Bu barədə RİYAD MEDİA-ya DİUC-dan bildiriblər.

Görüşdə  vətəndaş cəmiyyətinin nümayəndələri son zamanlar Ədliyyə nazirliyinin heç bir əsasa söykənmədən QHT-lərin qeydiyyatından imtina etməsi, eləcə də 3-cü sektorun fəaliyyətinin məhdudlaşdırılmasına və onların fəaliyyəti üzərində nəzarətin gücləndirilməsinə yönəlik hərəkətlər barədə Avropa Komissiyasının Azərbaycandakı nümayəndələrini məlumatlandırıblar. Görüşdə iştirak edən QHT nümayəndələri həmçinin qeyd ediblər ki, Azərbaycanda vətəndaş cəmiyyətinin çoxsaylı problemləri var.

QHT nümayəndələri  problemlərin araşdırılıb tədqiq olunması və həll edilməsi yönümündə Vətəndaş Cəmiyyətinə Dəstək Koalisiyasının (VCDK) müxtəlif tədbirlər həyata keçirdiyini və bu yöndə beynəlxalq qurumlarla əməkdaşlıq etməkdə maraqlı olduqlarını Avropa Komissiyasının Azərbaycandakı nümayəndəliyinin nəzərinə çatdırıblar.