Bakı. Azərbaycan Respublikası Dövlət Neft Şirkəti (ARDNŞ) cari ilin iyun ayında dövlət büdcəsinə 88 milyon 690 min manat vəsait ödəyib. ARDNŞ-dan RİYAD MEDİA-ya verilən məlumata görə, bu göstərici ötən ilin iyun ayına nisbətən 638 min manat və ya 100,7 % çox olub.

2010-cu ilin yanvar-iyun aylarında isə büdcəyə 513 milyon 972 min manat ödənib. Bu, ötən ilin müvafiq dövrü ilə müqayisədə 116 milyon 949 min manat və ya 129,5 % çox olub. Bundan başqa, cari ilin iyun ayında ARDNŞ Dövlət Sosial Müdafiə Fonduna 11 milyon 634 min manat vəsait köçürüb. Bu, ötən ilin iyun ayına nisbətən 850 min manat çox (107,9 %) deməkdir.

Ümumiyyətlə, cari ilin yanvar-iyun aylarında Şirkət tərəfindən Dövlət Sosial Müdafiə Fonduna ödəniş 61 milyon 257 min manat təşkil edib ki, bu da ötən ilin müvafiq dövrü ilə müqayisədə 8 milyon 434 min manat çox (116,0 %) olub.