Bu gün Azəri Press Agentliyi (APA) Azərbaycan Respublikası Prezidenti yanında KİV-in İnkişafına Dövlət Dəstəyi Fondunun dəstəyi ilə reallaşdırdığı “Hərbi vətənpərvərlik şüurunun formalaşdırılmasına KİV dəstəyi” adlı layihə çərçivəsində “Jurnalistlər üçün hərbi məlumat kitabı”nın təqdimatı keçirilib. RİYAD MEDİA-nın xəbərinə görə, Agentliyinin baş direktorunun birinci müavini Nurşən Quliyev bildirib ki, kitab, əsasən hərbi sahədən yazan jurnalistlər üçün nəzərdə tutulub: “Kitabda hərbi sahədən yazan jurnalistlər, eləcə də bu mövzuya maraq göstərənlər üçün gərəkli olacaq bir sıra hərbi terminlərin və anlayışların izahı verilib”. 
Azərbaycanın müharibə vəziyyətində olduğunu deyən N.Quliyev, bu səbəbdən mətbuatda hərbi mövzuda yazılara tez-tez rast gəlinir: “Bu yazılarda isə hərbi terminlərin istifadəsi zamanı müəyyən problemlər yaranır. Məhz bu problemi görüb, adıçəkilən kitabın nəşrini məqsədəuyğun hesab etdik. Düşünürük ki, kitab jurnalistlərə yardımçı və stolüstü kitab ola biləcək”. 
 Qeyd edək ki, 300-ə yaxın hərbi termin olan kitab, 1000 tirajla çap olunub və pulsuz paylanılır.