Bu gün Bakı Dövlət Universitetinin (BDU) rektoru, millət vəkili Abel Məhərrəmovun 60 yaşı tamam olur. RİYAD MEDİA-nın xəbərinə görə, Abel Məmmədəli oğlu Məhərrəmov 1950-ci il yanvarın 5-də Ağdam şəhərində anadan olub. Orta məktəbi medalla bitirdikdən sonra A.Məhərrəmov 1966-cı ildə Bakı Dövlət Universitetinin kimya fakültəsinə qəbul olub və 1971-ci ildə oranı əla qiymətlərlə başa vurub. A.Məhərrəmov Universiteti bitirdikdən sonra təyinatla Ümümittifaq Olefinlər Elmi-Tədqiqat İnstitutunda operator, sonra isə mühəndis vəzifəsində çalışıb. 1973-cü ildə M.V.Lomonosov adına Moskva Dövlət Universitetində «Üzvi kimya» ixtisası üzrə əyani aspiranturaya daxil olub.

1976-cı ildən BDU-da elmi-pedaqoji fəaliyyətə başlayan A.M.Məhərrəmov 1991-ci ilədək BDU-da baş elmi işci, baş müəllim, Universitetin tədris hissəsinin müdiri, sonralar isə dosent və dekan müavini vəzifələrində çalışmışdır. 1991-ci ildən «Alkenlərin, üçüzvli karbo- və heterotsiklik birləşmələrin elektrofil reaksiyaları əsasında yeni sintetik yanaşmalar» mövzusunda doktorluq dissertasiyasını müdafiə etmişdir və həmin ildən də «Üzvi kimya» kafedrasının professorudur. 1993-cü ildən 1999-ci ilin yanvar ayına qədər BDU-nun kimya fakültəsinin dekanı vəzifəsində çalışıb. 1995-1997-ci illərdə Respublika Ali Attestasiya Komissiyasının qərarı ilə yaradılmış namizədlik və doktorluk müdafiə şurasının sədri olub

1998-ci ildə Nyu-York Elmlər Akdemiyasının həqiqi üzvü seçilib. O, elmi-pedaqoji fəaliyyəti dövründə xaricdə və respublikamızda dərc olunmuş 600-ə yaxın elmi əsərlərin müəllifidir. O cümlədən 33 ixtiranın müəllifidir, 8 monoqrafiyası, 37 dərslik və dərs vəsayiti çap olunmuşdur. İlk dəfə ana dilimizdə çapdan çıxan «Kiçik kimya ensiklopediyası» kitabının müəlliflərindən biridir.

1999-ci il yanvar ayının 11-də Respublika Prezidenti Heydər Əliyevin fərmanı ilə BDU-nun rektoru təyin olunub. 2000-ci ildən Respublika Ali Attestasiya Komissiyasının qərarı ilə BDU-nun nəzdində yaradılmış doktorluq və namizədlik Dissertasiya Şurasının sədridir. 2000-ci ildə Abel Məmmədəli oğlu Məhərrəmova «Əməkdar elm xadimi» fəxri adı verilib.

Ailəlidir 3 övladı, 4 nəvəsi var.