Bakı. Rəşad. “Azercell Telekom” MMC 2009-cu ilin yekunlarını haqqında mətbuat üçün konfrans keçirib. RİYAD MEDİA-nın xəbərinə görə, Şirkətin Korporativ Ünsiyyət və Sosial Məsuliyyət bölümünün rəhbəri Ülviyyə Həsənzadə ötən ilin yekunlarına dair statistik məlumatları nəzərə çatdırıb. Ü.Həsənzadə bildirib ki, “Azercell Telekom” MMC Azərbaycan mobil rabitə bazarının 57,6%-nə nəzarət, ölkənin 80%-ni əhatə edən şəbəkə və nəhayət 4 milyona yaxın abonentə malikdir.

“Azercell Telekom” MMC 2009-cu il boyunca şirkətin ölkəmizin telekommunikasiya sahəsinin inkişafına təqribən 57,9 milyon ABŞ dolları, ölkədə fəaliyyət göstərdiyi 13 il ərzində isə 1 milyard ABŞ dollara yaxın investisiya yatırdığını açıqlayıb. Vergilərə gəlincə Ali Ağan ötən il üçün “Azercell Telekom” MMC-nin dövlət büdcəsinə təqribən 150,7 milyon ABŞ dolları ödədiyini deyib: “13 il ərzində bu göstərici təqribən 753,6 milyon ABŞ dolları təşkil edir. Ümumiyyətlə, 2009-cu ildə “Azercell” ödəmələrinin büdcədə xüsusi çəkisi təqribən 2,7 % təşkil edib.”

Bundan başqa Şirkət öz işçilərinin inkişafına təxminən 1,6 milyon ABŞ dolları, 13 il ərzində isə 9,7 milyon ABŞ dolları həcmində sərmayə yatırıb.

Ötən il ərzində 177 yeni radio-baza quraşdırıldığını, indi onların ümumi sayının 1700-ə çatdığını deyən Ü.Həsənzadə günəş və külək enerjisi ilə işləyən ilk radio-bazanın istifadəyə verildiyini də jurnalistlərin diqqətinə çatdırıb.